MENGENAL ADAT DAN BUDAYA MINANGKABAU

By bahri 08 Jun 2020, 08:15:47 WIB Seni & Budaya Minang Kabau
MENGENAL ADAT DAN BUDAYA MINANGKABAU

Keterangan Gambar : Herlina Hasan Basri


Dalam adat minangkabau anak laki2 diwajibkan pergi merantau,dan itu sudah merupakan salah satu adat dan budaya Minang yg harus dijalaninya untuk mencari pengalaman dan penghidupan yang layak bagi keluarganya,itulah sebabnya sejak jaman dahulu orang minang banyak yang berhasil.

 

PITUAH MANDEH KA ANAK BUJANG                 

Baca Lainnya :

 

Elok elok anak dirantau

Lauik sati rantau batuah

Usah lupo pai kasurau

Jikok barasaki basidakah

 

Rantangkan tali kalangik nak

Jalin kulindan diateh bumi

Hubungan jo ALLAH dipa arek

 

Parapek pulo sasamo insani    

Hilia kabukik rimbo panjang

Tikuluak nan usah ditanggai

Usah ditompang hati gadang

Isuak nyo badan disasali

 

Kalilah banda tanamlah lantak`nak

lalu aia ka muaro

Awal dikana akhia dikana

Alamaik kajadi sio sio

                          

Dikameh sagalo kameh

Dek padi iyo sagalo jadi

Usah anak bamaleh maleh

Rajin rajin anak mancari

 

Kok lai barasaki banyak

Saketek paralu disimpan juo

Kanalah badan katalatak

Ingeklah nanti awak ka tuo

 

Usah maminum sadaguik abih

Mamakan usah sakulek hilang

Bahemat hemat jikok bapitih

Balanjo nan usah gadang

 

Tangguak rapek karuntuang jarang

Dimanolah ikan ka tabao

Gaji ketek balanjo kok gadang

Alamat badan kasansaro

 

Kawan galak mudah dicari

Kawan manangih jarang basuo

Galak tabahak dimeja judi

Manangih surang dipanjaro

 

Usah main bahuru huru

Pai malala kian kamari

Pandai pandailah mambagi waktu

Baiak siang maupun malam hari

 

Jikok minum dikadai kopi

Minumlah kopi nan samangkuak

Jauhilah wisky jo cointreau

Usah minum nan mambuek mabuak

 

Kurai taji pakan sinayan

Urang manjua lado mudo

Capek kaki ringan tangan

Namun salero kalapeh juo

 

Capek kaki usah panaruang

Capek tangan usah manyambo

Kadalam tansi lalok baguluang

Sasa tumbuah ndak ado guno

 

Apo talatak nak ma ambiak

Apo tajumbai nak maelo

Hiduik didunia indak salamaik

Mati basinggang dinarako

 

Jikok anak pai ka pulau

Hiu bali balanak bali, ikan panjang bali dahulu

Jikok anak pai marantau

Ibu cari dunsanak cari, Induak samang cari dahulu

 

Jikok pandai bakain panjang

Labiah elok bakain saruang

Jikok pandai bainduak samang

Laiah elok dari sanak kanduang

 

Tagaklah anak di nan data

Tagak diadat jo aturan

Badirilah anak di nan bana

Mungkin jo patuik ka ukuran

 

Kalau sipadan diasak urang

Nan bana nyo tuka tagak 

Tunjuakkan awak sabagai anak minang

Usahlah takuik darah taserak

 

Darah ayah turun ka anak

Warih dijawek dek kamanakan 

Usah mundur walau satapak

Hadok i malah sacaro jantan

 

Kok pai anak ka batawi

Mancari pitih dirantau urang

Usah sampai tajarek kaki

Sahinggo lupo jo ranah minang

 

Jam gadang dibukiktinggi

Talatak dipasa ateh

Disimpang jalan kampuang cino

Pandai mangarang urang di batawi

Bungo dibuek dari karateh

Takicuahlah kumbang dibueknyo

 

Bungo harum warnanyo merah

Man banyak tumbuah ditapi jalan

Bungo baracun mintak darah

Lah banyak kumbang jadi korban

 

Randahnyo jambo jamboan

Mudahlah bana mamatiaknyo

Sakiro anak indak bariman

Londoanglah badan kanaraako

 

Jikok buliah kandak bakandak

Iyo sasuai jo nan salero

Induak bareh handaklah urang awak

Urang awak minantu bundo

 

Carilah gadih nan rancak

Nan baiak budi nan elok baso

Didalam wilayah nan tigo luhak

Iyo didaerah ranah bundo

 

Gadih nan jombang pandai mamasak

Urangnyo saulah elok laku

Manih juo walau tak babadak

Bibianyo merah tak bagincu

 

Pandai masak jo marandang

Pandai manjaik jo marendo

Pandai mangaji ta`at sumbayang

Rajin sidakah ta`at puaso

 

Kuliknyo nan kuniang lansek

Balasuang pipik dipipinyo

Paibo ka urang gaek

Panyayang kasanak sudaro

 

Laguah lagah bunyi padati

Pdati anak urang kamang 

Mambao patai jo lado

Bialah sapiriang dapek pagi

Walaupun sasuok dapek patang

Ijanlah sampai baputuih aso

 

Ijuak kok nyato jadi tali

Anau dirimbo kanalah juo

Isuak ko ado lai barasaki

Usah lupo sanak sudaro

 

Bialah luluah padi dibalam

Namuan dadak baniahkan juo

Bialah rusuah hati didalam

Namun galak manihkan juo

 

Bakabuik gunuang talamau

Hilang ditimpo paneh pagi

Usah buyuang hanyuik dirantau

Jalang juo sanak famili

 

Jikok kaladang buyuang bisuak

Padi nan indak ado lai namun banto siangi juo

Jikok pulang buyuang bisuak

Kami nan indak ado lai

Namun pusaro siangi juo

 

Babuek baiak pado pado

Nan buek buruak sakali jaan

Jan sampai taniayo diri

Sayang ka urang jajok dibadan

 

Semoga manfaat.

 

ditulis kembali oleh Herlina Hasan Basri

 

Aku Bangga Menjadi Anak Minangkabau




Write a Facebook Comment

Tuliskan Komentar anda dari account Facebook

View all comments

Write a comment