Asmara Inyiak Balang (Episode 17-1): Cimburu Nan Salah Biliak

By bahri 20 Agu 2020, 08:51:32 WIB Cerber Adjo Flamboyan
Asmara Inyiak Balang (Episode 17-1): Cimburu Nan Salah Biliak

Dalam kahidupan manusia biasonyo ado sapasang sapasang. Ado siang ado malam. Hujan baganti paneh garang. Hiduik sanang ado pulo nan susah. Sabanyak urang sayang sabanyak itu pulo urang nan banci.

Rumi baruntuang dapek lki gaek Nuh. Kama mangganti lapiak uninyo Syarifah nan alah maningga.

 

Baca Lainnya :

Namun, ado lo nan maraso tasakiki dek rancananyo ka manjadikan gaek Nuh kajadi lakinyo gagal dengan parkawinan Kama. Itulah etek Kama nan jando kambang ditingga lakinyo maningga.

 

Sabagai surang jando nan salamoko sangaik ingin jadi bini gaek Nuh, Kama nan sijando kambang nan masih semok. Sabalun Rumi datang ukatu maantakan si Buyuang baubek dek kakinyo dicucuak duri dulu, Kama acok singgah di pondok gaek kalo pulang dari ladang. Ladang Kama indak jauah ari ladang gaek, hanyo satangah jam bajalan sajo.

 

Kama memang tipe padusi nan agresif dalam mandakeki gaek Nuh. Kalo datang ka pondok Kama acok mampacaliakkan pamandangan nan bisa manggoda laki-laki. Sutan Mudo nan sabana tagilo gilo di si si Kama sabananyo ingin bana mancubo ka mamaguik Kama kalo basobok. Sayang Kama indak amuh jo Sutan Mudo, nan muncuangnyo acok baciik co silangkaneh. Kama mainda kalo basuo jo Sutan Mudo, takuik kok kadiperkosa beko. Tapi kalo ka haji Nuh, iyo sabana tagilo Kama untuak mancubo manggoda. Kalo di pondok ado haji Nuh, Kama mancubo mancalikkan pesonanyo nan masih manarik nafsu laki-laki. Parnah, Kama mancogok di pintu pondok, sangajo maluncuekan bukakan bajunyo. Dado Kama nan mambusuang manampakkan duo bukik nan putiah dibaliak kutang hitam. Kama ingin dadonyo tu supayo dirameh dek gaek Nuh. Kalo bisa dirameh Nuh, pasti Kama ka manyarahkan dirinyo dilameh sapuehnyo. Sayang haji Nuh adolah laki-laki nan kuaik imannyo. Gaek haji Nuh indak tagoda dek kurenah si Kama. Memang sabagai laki-laki parnah haji Nuh hampie ka mambali galeh si Kama. Mancalik paho putiah Kama nan nyo senseng sampai ka pangkanyo ukatu mancubo mintak udang nan dipanggangnyo didapue, mambuek mato gaek mncilalak tabudue. Kutiko itu hari hujan, Kama bataduah di pondok. Gaek sadang mameloki atok ilalang nan agak tirih di dapue. Disodorkan Kama dengan pamandangan co itu, mambuek galembong gaek manggaleong nan di muko, minta kalua.  Paja tu mambarontak minta dikaluakn dek mancaliak lawan mainnyo alah diap mananti. Tapi gaek bisa manahannyo, “Astagfirullah, Kama bersekan baju kau tu”, kecat gaek mamberangi Kama. “Eeeh iyo tuan haji”, inyo malah manyensengkan kahonyo sabalah lai. Gaek tambah berang, tapi Kama malah mandakek ka gaek, maonyokkan muncungnyo supayo diidu dek gaek. Hampie gaek silap, nak ka mambali galeh perai nan ka diagihkan dek Kama. Untuanglah Tuhan masih malindungi gaek, hujan baranti dan gaek manyuruah Kama baliak pulang.

Kama sabana mangka hatinyo, gaek bundung mah, diagih barang perai inyo indak amuh. Sutan mudo kalo den agih co iko, pasti alah ditilanjanginyo den mah. Sayang muncung si Tan Mudo angik baun bangkai, maloyor paruik awak dinyo. Ko gaek indah banafasu lai mah, alah indak amuh hiduik si buyuang keteknyo kali go, ngomel Kama sapanjang jalan, baliak ka rumahnyo di Kandang Ampek.

 

Tuhan mamantukan lain. Masih malindungi gaek jo godaan Kama. Tuhan manadatangkan Rumi nan labiah ancak dari Kama. Karano Tuhan mantakdirkan Rumi nan ka jadi bini kaduo gaek Nuh satalah Syarifah maningga nantiknyo.

 

Sasudah mandanga gaek haji Nuh kawin jo bakeh urang Bunian nan banamo Rumi, sabana sakik hati si Kama. Alah putuih harapannyo. Kama baniaik ka mangarajokan Rumi jo gasiang tangkurak. Ado dukun sati nan pandai maubekkan sakik hati dek masalah jodoh ko. Dukun si Karuik nan bapondok di Mudiak Padang ka dicubo ka didatangi Kama. Den gasiang gau Rumi. Den indak rela doh gau kawin jo haji Nuh. Alaha lamo den bausaho supayo Nuh amuh jo aden, ee malah agau nan mandapek. Sungguah sabana sakik hati den Rumi, kaleren gau mah. Kama manyumpah katiko mancubo bajalan ka kampuang Mudiak Padang dikawani amaknyo. Anam jam bajalan kaki dari Kandang Ampek sampailah Kama di pondok si Karuik.

 

Sanjo tu dukun Karuik, sadang paraktek pangobatan jarak jauah surang gadih nan tagilo gilo jo surang duda kayo di Piaman. Gasiang tangkurak diputa dek dukun Karuik.”Siiiing..nguuuung...siiiing....nguuung, oi gasiang tangkurak, datanglah datang jihin sati jumbalang kubue. Baok pasan si Gadiah ka apak Anu di Piaman. Bisiakkan katalingo apak Anu pasan kasiah si Gadih. Pasan cinto andak babaleh, baputa hati apak Anu, babaliak mancintoi si Gadih. Oi gasiang tangkurak..siiiing...nguuuung...nguuung. Jihin pirik panjago kubue, baok pasan kini juo, jagokan malah apak Anu. Kok jago indak bisa lalok, kok lalok indak bisa jago, barasian tarus jo si Gadih, mamanjek dindiang apak Anu, baru sanang hati si Gadih...nguuuung....siiiiing...nguuuung, gasiang tangkurak.

Abuak gimbal si Karuik sabana kusuik sanjo tu, dek baputa pulo ukatu maubek jarak jauah tu. Mato Karuik sirah co buah sago, dek sadang kamasukan arawah Jihin Jumbalang panjago kubue dek diimbau dukun si Karuik

 

“Assalamulaikum, nyiak”, Kama mancubo maimbau dukun Karuik.

 

“Waalaikum salam, masuaklah, apo kaba kini go”, mancaliak Karuik ka pintu, nampaklah surang padusi semok tagak dipintu pondok jo surang amak gaek.

 

“Iyo nyiak ambo si Kama, baniaik ka baubek go ha”.




Write a Facebook Comment

Tuliskan Komentar anda dari account Facebook

View all comments

Write a comment