Asmara Inyiak Balang (Episode 15-3): Mangganti Lapiak

By bahri 17 Agu 2020, 08:09:49 WIB Cerber Adjo Flamboyan
Asmara Inyiak Balang (Episode 15-3): Mangganti Lapiak

“Iyolah Rus, bia sasakali wak bagumbira di pondok ambo nan buruak ko. Bagalak galak awak manjalang subuah sambie mandanga alunan saluang si Ali. Bia awak agih uang rokok si Ali jo bali badak si Da tu beko”, kecat haji Nuh gumbira.

“Alah langkok awak, buliah dimulai, baa Ji”, tanyo tuan Kadi.

“Jadih ngku Kadi”, jawek gaek haji Nuh lambek.

Baca Lainnya :

Tek Nian mambaok carano langkok jo siriah bakarang, jo bansi sadah dan siriah pinanng di dalamnyo ka tangah. Ba atakkan dimuko tuan Kadi. Tuo Ana mambaok Qur’an jo rehal. Basandiangkan jo carano, balatakkan dimuko tuan Kadi. Tek Nian masuak kamar, mambaok anak daro kalua, bajalan lambek-lambek, samuik tapijak indak mati. Maloncat incat mato sadonyo mancalik dewi kayangan nan alah turun ka bumi. Sabana rancak si Rumi. Bakodek biron batiak, baju kebaya putiah barendo, salendang putiah suto nan babungo jambu aie, manutuik rambuik Rumi nan diguluang basanggue ketek.


Haning sadonyo. Iyo bana go mah, ratu Bunian nan turun ka bumi dari Bukik Tui. Iyo curito urang tantang urang Bunian nan banyak gadih-gadih rancak, kini memang tabukti dek adonyo anak daro nan banamo Rumi.

“Alhamdulillah, awak mulai. Tuan haji Nuh, duduaklah tapek di muko ambo. Diapik suok kida jo duo urang saksi. Ambo Kadi juo bapungsi sabagai mawakili pihak haji Nuh. Saksi alah siap kaduonyo.

“Tuan haji Nuh, iriangkan kecat ambo dih”.

“Iyo tuan Kadi”, jawek Nuh.

“Bismillahirrahmanirrahim. Asyhadu alla illa ha Allah, wa asyhadu anna Muhammadar RasulAllah.

Ambo nikahkan haji Muhamad Nuh, dengan Rumi, dengan membayar mahar sebuah AlQur’an dan perangkat shalat sajadah, dibayar tunai. “Jawek dek haji Nuh”.

“Ambo tarimo nikahnyo Rumi, dengan membayar mahar sebuah Al’Quran dan seperangkat alat shalat sajadah dibayar tunai”.

“Baa,di saksi, apo sah? “Sah dan jaleh”, jawek pak Pudin dan uda Idrus, sabagai saksi.

“Alhamdulillah”, mari kito badoa basamo untuak kabahagiaan kaduo suami isteri, haji Nuh dan Rumi. Samoga diberkati Allah perkawinan kaduonyo. Amiiin.

“Amiiin”, Rumi manakue. Aie mato kabahagiaan jatuah badarai di pipinyo. Tek Nian, sato lo sabak matonyo, sambie mauruik pungguang Rumi, tek Nian ba bisiak.


“Salamaik yo tek Rumi, kini etek alah langkok kabahagiaan hiduik disampiang ayah haji”.

Tek Nian maimbau etek ka Rumi, sabab Rumi adolah adiak Syarifah mintuo tek Nian. Suami tek nian Adnan adolah anak dari gaek haji Nuh dengan uwainyo Syarifah.

Tek Nian mambimbiang Rumi baliak ka kamar. Rumi langsuang marabahkan badannyo, managih sajadinyo tando bahagia.

Dibaliak pondok, dilua malam itu, Buyuang si harimau cindaku, anak Rumi, manggaruang mandanga amaknyo baliak dapek suami. “Auuum...auuum...auuum”, ya Allah bahagiakan amak ambo.

Hari tapek jam duo baleh malam, bulan redup tapek di pucuak batang baringin di tangah ladang. Buyuang manyingkie ka tapi ladang. Buyuang manangih sajadinyo. Bajanji ka Allah ka manjago amak jo ayah barunyo haji Nuh.

“Assalamulaikum”, dipintu pondok mancogok Bujang, diiringi Ali jo si Da isterinyo.

“Ha..ha.. masuak Li, masuak Da”, kito ngupi dulu. Baru basaluang awak sampai pagi.

“Ambo basalam jo gaek haji dulu ah. Salamaik gaek samoga bahagia parkawinan gaek jo anduang Rumi, InsyaAllah”.

“Amiiin”, makan pisang goreng dulu Li, Ida, kecek haji Nuh”. “Bujang, kawani si Ali jo si Ida, baduo Bujang jo Idrus nan maatur caranyo”.

“Iyo gaek, tarimo kasih”.

“Jadih gaek”, Bujang sabana gadang hatinyo malam itu. Gaeknyo nan dihormati dan disayanginyo mandapek jodoh baliak, anduang Rumi nan juo disayanginyo.






Ali mulai maambus saluangnyo. Mulai jo lagu Singgalang Kariang. Diiriangkan suaro merdu bininyo Ida.

Kampuang tangah di kaki bukik. Stasiun tingga, kureta lah jalan

Saluang diambus dari hati. Ampun jo doa ambo mintakan

Kureta mandaki asok manjulang. Singgalang Kariang Bukik nan tinggi

Adiak kanduang lakehlan gadang. Uda mananti ndak saba hati

Dimuko banda nan mailie. Di kampuang tangah bajauahan

Cinto ka uda sabana caie. Tagah dek uda baacuahkan

Kasiak taserak di lubang kalam. Goyang kureta manggiliang paku

Denai babisiak tangah malam. Pulanglah uda denai lah rindu

Tambah malam tambah sero dan mandayu suaro Ida mairiangkan lagu Kelok Sambilan jo Mudiak Arau. Tek Nian jo tuo Ana sabana asyik mandangakan sambie mambuek goreng pisang tambatu. Dimasak jo nasi lamak bareh katan. Baserakkan karambie di atehnyo. Ondeh mandas, sabana sero mangunyahnyo sampai pagi.

Alek parnikahan gaek haji Nuh jo anduang Rumi sabana mariah sampai pagi.

Jadilah kaduonyo suami isteri nan sah sacaro ugamo dan syar’i.




Write a Facebook Comment

Tuliskan Komentar anda dari account Facebook

View all comments

Write a comment