16-1. CINTO BARANDAM DALAM LUBUAK

Manjalang subuah baru salasai pesta saluang samalam suntuak di pondok gaek di Rimbo Baruah.

Baca Lainnya :

• TRANS-TURKI: Negeri Keluarga Rasulullah SAW (1)0
• Asmara Inyiak Balang (Episode 15-3): Mangganti Lapiak0
• Asmara Inyiak Balang (Episode 15-2): Mangganti Lapiak0
• TRANS-TURKI: Sang Pengembara 20
• Asmara Inyiak Balang (Episode 14-4): Matoari Tabik Sanjo0

Tuan Kadi haji Rahim, marapulai haji Nuh, pak Pudin, da Idrus, Bujang sumbayang subuh di tapi batangtarok, di rumpuik data dibawah batang lundang.

Sakalian mandoa salamaik, untuak kahidupan kaluarga baru haji Nuh dan isterinya Rumi.

Di pondok, Rumi nan dibantu tek Nian mambuek ayam singgang. Masakan ayam singgang atau ayam kalio nan banyak kunyiknyo dan kuahnyo dek bakocokkan talue, sabana lamak dimakan pagi jo katan nasi lamak.

Duduak di lapiak purin, diujuang tuan Kadi, disampiangnyo marapulai haji Nuh, pak Pudin, uda Idrus, Ali.

Bujang manatiang hidangan dibantu dek uni Ida isteri Ali. Anak daro dibantu mak Tuo Ana, tek Nian alah bakucatak di dapue. Harum ayam singgang lah tabaun mambuek galang-galang manggaruang mintak makan.

“Bismillah, mari makan awak lai, kato tuan haji Rahim, nan manjadi pangatuo alek. Baa dek alek go ha, pak Pudin, ananda Idrus, Ali, lai lah langkok ko jamba katangah, bapulangkan sambah ka bakeh pak Pudin alek kami”, sambah tuan Kadi.

“Alhamdulillah, ka jaweknyo tuan Haji. Basarah awak ka Nan Satu, Allah Subhanahu Wataala, jo Bismillah juo kami sambuik. Jungkekkanlah dek tuan haji, nak kami patiangkan pulo disiko”, bajawek sambah dek pak Pudin.

“Jadihlah samo-samo awak mambasuah tangan lai”.

Makanlah jo lahapnyo alek jo sipangka. “Jan babaso pak haji”, mak Tuo Ana sambie lewat mambaok nasi sapiriang untuak anak daro nan musti makan di kamar.

Salasai makan, manyambah alek pak Pudin ka sipangka tuan Kadi haji Rahim .

“Alhamdulillah, kok pintak jo pinto kami ka pihak sipangka. Paruiklah kanyang, lah tabukak kri-kiro, iyo nak mintak ini kami maurak langkah babaliak pulang lai”.

“Di kami alah sanang hati kami, alek kami nan alah kami muliakan, kok indak lamak gai samba kami, kuah nan indak bagaram, kuah ka tatunggang ka nasi juo, bari rilah kami sipangka. Jo putiah hati kami lapeh alek kami.

Alek, pak Pudin, uda Idrus, Ali, maurak langkah. Di pintu di tunggu Bujang jo sabungkuih ayam singgang.

Pulanglah alek karumah masiang-masiang.

“Ambo bagarak lo baliak lai pulang haji Nuh, samoga Allah mambarakati. Amiin. Tuan Kadi haji Rahim juo mintak diri pulang. Mak Tuo maagiahkan sarantang makanan untuak tuan Kadi.

Mak Tuo Ana, tek Nian, jo si Bujang mintak ijin, dek ka babaliak ka Kayutanam, mairiangkan pulo di balakang.

Tinggalah gaek haji Nuh di pondok jo anak daronyo Rumi nan talalok di biliaknyo.

Hari nan alah tangah hari. Gaek haji Nuh, langsuang bainsuik ka Batangtarok, ka pai sumbayang luhue.

Mulailah kahidupan barubah di pondok di Rimbo Baruah.

Pondok nan sunyi sepi salamoko, alah bauni jo sapasang pengantin baru. Rumi dewi kayangan nan salamoko jadi impian dalam lalok haji Nuh, kini alah mandampingi hiduiknyo.

Matohari kahidupan basinar dengan tarangnyo di Rimbo Baruah. Sapasang balam sadang bagaluik sambie bagemai jo maangguak angguak...takukuuur...takukuuur...takukuuuur.

Si Bujang anak Rumi nan masih bawujud Cindaku harimau jadi-jadian sabana manjago amak jo ayah tirinyo. Siang kalo si Bujang pulang sikola pai ka pondok. Mareka bamain baduo dalam rimbo. Bujang suko bana manjarek ayam hutan nan anggah merahnyo jo bulu merah hitam nan jantan.

Si Buyuang mambantu mahalau ayam hutan itu mandakek ka ayam pamikek. Duo ayam jantan tu langsuang malapue bacakak. Ayam hutan nan baru masuak langsuang tajarek kakinyo dek sakuliliang bapasang jarek nilon nan indak nampak di ayam tu.

Malam hari, kini Bujang lalok di pasa dirumah amaknyo tek Nian. Bulan muko Bujang ka pindah sikola masuak SMA di Padangpanjang. Sakali saminggu baru baliak ka Kandang Ampek. Hari minggu Buyuang sato mancaliakkan si Bujang manangkok lauak di Batang Anai. Buyuang maandok andok di samak samak, bia indak nampak dek kawan si Bujang, si Amir dan si Tiar.

Jam anam, gaek manjagokan Rumi, ka pai mandi di lubuak di Batang Tarok. Mareka sumbahyang mugharik dulu, sudah tu baru pai ka lubuak untuak mandi.

Gaek masih raso malu mambukak bajunyo, mamakai sarawa kotok, langsuang masuak lubuak. Rumi labiah malu pulo, mamakai kain basahan sampai dado, Rumi sato masuak lubuak.

“Tuan, awak dingin”, kecek Rumi, Badan nyo nan putiah manggigie ka dinginan dalam lubuak. Hari alah mulai kalam. Gaek datang mandakek. Rumi langsuang mamaluak gaek. Gaek takajuik, Rumi mambukak kain basahannyo. Tubuah putiah Rumi langsuang dipaluak gaek. Gaek maelo Rumi ka ateh batu hitam di tapi lubuak. Bibie tipih Rumi tibo-tibo basobok jo muncung gaek. Rumi maluncue turun ka kasiak di tapi batu. Udang galah hitam nan siap di tapi aie disampiang batu takajuik. Capek udang nan gagah hitam, langsuang manculam dek manampak sarang di mukonyo. Lubang sarang nan alah lamo indak dilaluinyo taraso agak sampik. Udang tu mancubo masuak. Dek ado aie dalam lubang tu, badan udang nan bungkuak kareh tu masuak juo. Sikue murai batu agak tapakiak. Takajuik dek mancaliak udang hitam itu mahunjam kuaik masuak sarang.

Hari batambah kalam di lubuak di bawah batang lundang di Batang Tarok. Gaek maelo Rumi masuak kadalam lubuak. Kaki gaek bakacimpuang manahan badan Rumi dibawahnyo.

Rumi marasokan aroma cinto asmara gaek jauah marasuak kadalam badannyo. Taraso bana ado aliran aie angek nan bacampue jo dinginnyo aie lubuak Lundang mambuek badan Rumi manggigie katagihan. Gaek manutuik muncung Rumi jo sentuhan asmara nan manghanyuikkan kaduonyo.

Mareka samo manggosok badan jo sabun lux nan dibali Rumi di Padangpanjang hari Jumat minggu lapeh.

Salasai mandi kaduonyo baliak ka pondok. Makan malam baduo sambie main cubit-cubitan. Salasai isya mareka masuak kamar.

Gaek kini manikmati pamandangan batih putih Rumi sapueh hati. Asmara terpuaskan manikmati maraguak malam pangantin baduo Rumi sampai pagi.

Buyuang manjago amaknyo, malam itu inyo lalok di tapi ladang.   

Buyuang badoa supayo capek dapek adiak nan dirindukannyo. Adiak nan bawujud manusia. Indak buliah sarupo jo wujudnyo sebagai harimau jadi-jadian. Harimau Cindaku nan sabananyo adolah satangah manusia juo.

Buyuang kan manjago ayah tirinyo nan kini alah jadi suami amaknyo.